ARGUMENTARI TAU NON
NANI A L'EURÒPA DEU CAPITAU E DEUS ESTATS ! BASTIM UA EURÒPA SOCIAU DE TOTS LOS PÒPLES !
Las borgesias capitalistas de l'Union Europèa que s'aprestan a dotà's d'un tractat constitucionau tà afirmar tostemps mei lo lor poder economic e politic de cara a U.S.A., Japon, China,…dens la luta tà gahar richessas, espleitacion deus pòples, dominacion deu monde.
Lo pòple occitan, com tots los pòples e especiaument los qui n'an pas d'Estat nacionau, qui son lavetz denegats en la lor identitat nacionau, non pòt esperar arren d'un tèxte qui non lo reconeish pas brica dens los sons drets nacionaus.
Que valida la plaça deus Estats com vertadèrs e sols interlocutors.
Per delà quauques principis moralistes aqueth tractat constitucionau qu'a per mira d'enterinar los tractats passats (Maastricht, Schengen…). La Constitucion perpausada que confirma la superioritat deus interès capitalistas suus deus pòples.
ANARAM AU PATAC, MOVEMENT REVOLUCIONARI DE L'ESQUÈRRA OCCITANA, QU'ARREFUSA AQUERA EURÒPA CAPITALISTA, IMPERIALISTA E MILITARISTA.
Contra aqueth tractat constitucionau,
Tà ua Euròpa de patz, de justícia sociau, ua Euròpa de tots los pòples, i comprés deus pòples shens Estat.
Tà ua auta Euròpa e un aute monde
NON au tractat constitucionau !!!
Lutem tà ua Euròpa antí-capitalista e antí-imperialista, de justícia sociau, de democracia au servici de tots los pòples.
I - NEGACION DEUS DRETS DEU PÒPLE OCCITAN E DE TOTS LOS PÒPLES SHENS ESTAT
Nosauts, Occitanas e Occitans n'am pas nat dret arreconeishut e garantit per aquera constitucion europèa, n'èm pas dens lo tèxte. Sols los Estats francés, espanhòu e italian qui'ns mestrejan, que'ns pòden arreconéisher aqueths drets :
dret
a la lenga occitana coma lenga nacionau, oficiau e prumèra,
dret
au son ensenhament,
dret
a l'ensenhament dens la lenga de la mairau a l'universitat,
dret
a l'expression de la nosta cultura nacionau,
dret
a l'autodeterminacion,
dret
a la nosta unitat nacionau e politico-territoriau per delà las frontèras deus
Estats francés, italian e espanhòu e los talhucatges regionaus, ……
Aquera constitucion europèa n'arreconeish pas tanpòc nat dret fondamentau aus autes pòples shens Estat.
Que defen l'integritat territoriau deus Estats, qu’ei tà díser en realitat l'intangibilitat de las frontèras estataus (assegurança de l'integritat territoriau deus Estats : art. 1-4), en tot hicar a despart atau lo dret politic fondamentau de tot pòple denegat e oprimit, lo de l'autodeterminacion e de la creacion deu son Estat pròpi. Dens aqueth sens lo tractat qu'ei pregondament reaccionari e imperialista, que concev l'Union Europèa com l'arrabòt nivelaire eternau que coneishem dejà de plan au dehens de l'Estat francés. Shens aqueth dret, l'independéncia deus país baltics, balcanics, de la Chequia, l’Eslovaquia e de l'Eslovenia n'estore pas estada possible.
Aqueth tractat qu'ei pregonament reaccionari e imperialista.
Çò qui aperam " regions ", qui an estatuts diferents segon los Estats, d'ua simpla decentralizacion a la francesa a las autonomias alemandas o ibericas, n'averàn pas poders vertadèrs. Lo conselh de las regions n'a pas qu'un ròtle consultatiu.
Los drets culturaus inscriuts dens la constitucion que son dejà referéncias de l'Euròpa qui coneishem uei.
Las culturas nostas que son sus la lista apitada per l'UNESCO. Que n'ei suu terrenh ?
Opression e repression : arrefús de ratificar la carta europèa de las lengas regionaus, article 2 de la constitucion francesa, interdiccion de la lenga occitana a tots los nivèus de l'ensenhament, cultura mespresada, folclorisada, ghettoïzada, denegada dens la soa unitat nacionau, la lista qu'ei longa vertadèrament…
Non sobra au pòple occitan com a tots los autes pòples denegats que lo poder e lo dever de mobilizacion e d'acarament politic tà atirar l'atencion de la comunitat internacionau e darrigar los sons drets.
II EURÒPA POLICIÈRA
Las leis europèas ratificadas per aqueras darrèras annadas, per ua part grana, qu'assolidan la collaboracion enter los Estats dens lo conta-ròtle deu poblan.
Qu'apresserà las disposicions legislativas e reglamentàrias dens lo maine de las libertats, de la securitat e de la justícia deus Estats membres : shens precizar quaus seràn las referéncias navèras. Qu'ei previst ua cooperacion operacionau de las autoritats competentas, i comprés deus servicis de polícia, de las doanas, …(art III 269 a III 277).
Aquera cooperacion que s'aplicarà au nivèu judiciari en l'encastre de perseguidas penaus e de l'execucion de las penas (Mandat d'arrèst europèu…).
Au nom de la luta contra lo terrorisme que poderàn har barrar jornaus que perpausan punts de vista diferents deus deu poder en plaça, que poderàn estar defenuts partits politics que remeten en causa lo sistèmi economic e politic en vigor, que poderàn estar empresoats sindicalistas que s'opausan au sistèmi capitalista.
Aquera uniformizacion deus mejans de repression que'ns pòt har pensar a çò sordeish : alinhament de las legislacions sus las mes duras de l'union, limitacion de la libertat d'expression (suu modèle de l'Estat espanhòu), intensificacion deus conta-ròtles policièrs, …
L'Union que's da lo dret de " limitar l'exercici deus drets e de las libertats, …, se hè necèra e se respon efectivament a besonhs d'interès generau… " (art …).
En clar, qué que sia que pòt servir d'argument tà limitar los nostes drets.
" Los Estats membres que s'engatjan a amelhurar drin a drin las soas capacitats militàrias. Qu'ei instituat ua agéncia dens lo domèni deu desvelopament de las capacitats de defensas, …(art I-41-3).
L'Union que's da un dret d'ingeréncia militària dens un país terç tà gestion de crisi o tà servir los sos interés ; l'armada que poderà interviéner donc on que sia o tà deféner los interés deu patronat europèu (art I-41 ;III 309 e III 311).
Aquera Euròpa que s'engatja dens ua corsa navèra a l'armament ; e que's da lo dret, com los USA, d'impausà's per las armas a on qu'at jutja necessari !
Tà acabar, l'Union que hè la causida de har fideutat a l'OTAN e que'n hè lo fondament de la soa defensa collectiva. Quan se coneish las posicions e los hèits imperialistas de l'OTAN, e donc deus USA, que's pòt chepicar tà la patz e tà l'aviéner.
AQUERA EURÒPA MILITÀRIA, SECURITÀRIA E IMPERIALISTA, NE'N VOLEM PAS !!! QUE VOLEM UA EURÒPA DE LAS LIBERTATS E PACIFICA !!!
III - DISCRIMINACIONS E ESPLEITACION SHENS LIMITAS
Aquera constitucion n'arraseja pas los drets de l'òmi, deus pòples, que per l'anóncia de bèras intencions : sordeish que deisha la pòrta ubèrta a la remesa en causa de mantuns drets.
L'article II-62 que ditz que " tota persona qu'a dret a la vita ". Devath l'expression aquera, com sovent lo cas ei, que s'escon de faiçon desaunesta, un present hèit aus antí-IVG e autes integristes d'Euròpa qui's sasiràn aqueth article per demandar l'interdiccion de l'Interrupcion Volontària de Grossessa.
Nada linha n'assegura lo dret a l'IVG, ni lo dret de dispausar deu son còs pròpi tà las hemnas. Atau Irlanda e Portugau, tà non pas parlar que d'aqueths Estats que pòden perseguir dens aqueth maine ua politica pregondament reaccionària.
De mes se la constitucion qu'anóncia que Hemnas e Òmis que son egaus, concrètament n'ei pas dada nada garantida per çò qui ei de l'egalitat deus salaris, Sordeish nat article non hè pas referéncia a las violéncias sofèrtas per las hemnas : violéncias qui son ua de las encausas màgers de la mort de hemnas !!!
Aqueth tractat que confirma l'Euròpa hortalessa dens la continuïtat deus acòrds de Schenguen.
S'òrb la soas frontèras interioras, l'Euròpa que durceish lo conta-ròtle de las soas frontèras exterioras. Que garanteish la mesa en plaça de quotàs. Non pren pas nada mesura conservatòria deus drets los mes favorables a las personas demandant l'acès. Sordeish, que preved lo partenariat dab país terç tà gerir lo flux de las personas demandairas d'acès, o ua proteccion subsidiària (art III 266-2-g). Que hica en plaça barbelats shens jamei chepicà's deu hat dramatic de milèrs de personas candidatas a l'imigracion e qui hèras at pagan de la lor vita (cada dia, ua barca de 40 plaças, que s'encalha vueita sus las platjas de Canàrias…).
Aquera Euròpa non preved pas lo simple dret de votacion de las personas estrangèras. Los tribalhadors(-ras) de soca " estrangèra non seràn pas egaus tanpòc de cara au dret deu tribalh " (nat article non ne parla)…
Enfin, l'Euròpa de segur que renvia tota persona qui non respon pas a las condicions d'entrada o de sejorn dens l'un d'aqueths Estats. Segon los sons besonhs de man d'òbra que guarderà o que renviarà personas com getan un mocader de papèr.
Aquera constitucion que causeish de tractar la " persona estrangèra " sia com ua criminau o un indesirable ; sia com man d'òbra espleitabla e a fóter dehòra.
D’AQUESTA EURÒPA NEGRÈRA E SEXISTA NE’N VOLEM PAS ! QUE VOLEM UA EURÒPA SOLIDARIA, UMANA, TÈRRA DE SOBAC !
IV - SISTÈMI CAPITALISTA
La mes grana partida deus articles d'aquera constitucion que tornan préner los tractats comerciaus ancians qui accelèran las politicas patronaus deus governaments passats, presents au poder per Euròpa. Las personas que son oficiaument libras de circular, sustot tà seguir las delocalizacions e estar espleitablas hèra… Arren sus l'obligacion d'assegurar aus pòples minimom vitau, tribalh, logament, santat, educacion tà tots e totas…
Tant lèu lo son preambule, la constitucion qu'anóncia la soa orientacion : lo mercat qu'ei prioritari au par de l'èste uman. La carta deus drets fondamentaus compausada d'un cinquantenat d'articles, (art II 61 a II 114) qu'ei en deçà de la Declaracion deus Drets de l'Òmi.
Aqueth document que's pausa clarament per la flexibilitat deu tribalh ; l'Union que dèu formar ua man d'òbra qualificada tà respóner viste hèit aus besonhs de las entrepresas capitalistas. E donc, l'article III-209 que's vira cap au mercat tà favorizar l'armonisacion deus drets sociaus !! Nada durada legau deu tribalh n'ei pas pausada. Tau dret de grèva o la proteccion deus tribalhadors(-ras), qu'ei la legislacion deus Estats qui mestreja : nada armonisacion n'ei pas prevista (art II-88 e II-90), encara mensh sus la basa deu dret deu tribalh lo mei avançat.
Lo dret a la proteccion sociau qu'ei tot juste arreconeishut (art II-94) ; arren non garanteish pas lo mantien deu sistèmi de solidaritat ; las prestacions de Securitat Sociau que poderàn estar asseguradas per entrepresas o asseguranças privadas, hons de pensions,… Qu'ei vertaderament la pòrta ubèrta a la privatizacion deu noste sistèmi de solidaritat, qui viste hèit precarizarà encara mei los mei praubes poblans.
L'article III-122 qu'anóncia la fin d'un servici public vertadèr en har vàder un " Servici d'interès economic globau ". Adonc, l'objectiu deu servici public n'ei pas la rentabilitat : au contra, que permet de garantir a cada persona drets elementaris : dret a l'educacion, a la santat, " au progrès ",… b'ei clar l'interès economic n'ei pas l'interès deus umans !
Qu'ei lo quite còr deu teishut sociau qui ei atacat : supression d'espitaus, de linhas de camins de hèr, de burèus de pòsta, privatizacion de la distribucion de l'energia (EDF - tà l'electricitat la privatizacion qu'avore l'avantage au noste punt de vista de portar ua auhèrta energetica alternativa au nuclear que EDF ei lunh hèra de perpausar, GDF…).
Las partidas qui pertòcan a l'agricultura, la pesca, l'industria, lo torisme que son tractadas deu punt de vista economic e de la rentabilitat sonque ; (art III 225, 232, 279).
NON VOLEM PAS D'AQUERA EURÒPA DEUS CAPITALISTAS ! QUE VOLEM UA EURÒPA DEUS PÒPLES, UA EURÒPA SOCIALISTA !
V - LA DEMOCRÀCIA ENGANAPÈCS
Lo foncionament de l'Union qu'ei antidemocratic, clavat e s'ei aprovada la constitucion aquera, que serà hèra mauaisit de l'arrevisar.
L'Euròpa que serà (e qu'ei) governada per instàncias qui non son pas esleguidas au sufragi universau dirècte : lo Conselh europèu, la Comission e la Banca centrau.
Lo Parlament, esleguit au sufragi universau dirècte que s'acontenta de votar las leis e d'adoptar lo budget ; que confirma la nominacion deu President de la Comission peu Conselh europèu e que pòt censurar la Comission.
La Banca centrau europèa, institucion escura e qui n'ei pas sosmetuda aus decís deu pòple, que defeneish e qu'entinoa la politica monetària de l'Union ; taus d'inflacion, nombre de liquiditats… que hè en acòrd dab los principis d'ua economia de mercat (art III-185) e qu'ei sola mestressa a bòrd.
L'art. I-47-4 que tracta deu tèma de la " democracia participativa " : " de ciutadans (-nas), au nombre de un milion de poblans e d'un nombre significatiu d'Estats membres, que pòden decidir d'envitar la comission, a sosméter ua proposicion en rapòrt dab questions tà las quaus aqueths ciutadans considèran un acte juridic qu'ei necessari tà l'aplicacion de la constitucion… ".
Qu'ei la democracia enganapècs ! Un milion de ciutadans (-nas) d'Estats diferents (de qui la lei definirà lo nombre…) que pòden har ua proposicion dens maines estrets e plan limitats ; proposicion qui serà censurada o validada per ua institucion qui n'ei pas esleguida au sufragi universau dirèct e qui segon çò qui vòu que la perpausarà o non a la discussion.
Que devem aver consciéncia se per cas aquera constitucion èra validada, que serà dificile hèra ; e quitament impossible d'i tornar dessús, tant ei clavada. Que seram definitivament engatjats(-das) dens ua Euròpa de cara umana ! [non compreni pas çò que vòs díser ací…] (art IV-443).
Tà poder cambiar non seré pas qu'un article, que calerà :
Consultar lo Parlament e la Comission, puish lo Conselh europèu, lo President deu Conselh que convocarà ua Convencion (parlamentaris nacionaus, caps d'Estats e de governaments, deu Parlament e de la Comission). (La BCE que serà consultada tà un cambiament dens lo maine monetari). La convencion qu'examina la proposicion e qu'adopta per consensús ua recomendacion. Enfin los Estats que deveràn acceptar a l'unanimitat lo cambiament …un sol Estat que poderà har blocatge mentre que non seràn pas consultats los pòbles.
VI - ARREGET DE LA LAÏCITAT
" L'union qu'arrespècta e non prejutja pas de l'estatut de qui benefician, segon lo dret nacionau, las glèisas e las associacions, o comunitats religiosas dens los Estats membres " … " Arreconeishent la lor identitat e la lor contribucion especifica, l'union que mantien un dialògue ubèrt, transparent e arregular dab aqueras glèisas e organizacions ".
La convencion europèa qu'arreconeish ubertament l'estatut de las glèisas, … e que compta entertiéner relacions estretas dab aqueras ; d'autant mei qu'arreconeish la lor contribucion especifica ! Aqueth ligam privilegiat enter l'Union e las glèisas crestianas que sorteish la religion deu maine privat. Aqueth article que respon a las exigéncias de la glèisa catolica e deus politicians reaccionaris qui reïvindican ua Euròpa crestiana … e quitament blanca.
Nada referéncia n'ei hèita a la laïcitat, ni quitament a la separacion de la glèisa e de l'Estat ; Nada referéncia n'ei hèita a la luta deus pòbles tà liberà's de la dominacion religiosa.
Alavetz l'Estat francés qu'ei partit en crotzada au nom d'ua laïcitat integrista e que s'aprèsta a tornar dar a la glèisa crestiana ua plaça politica digna de l'ancian regime.
NON VOLEM PAS D'UA EURÒPA DE SOTANAS, DE CUUS BENEDITS E DE LA CURALHA ! QUE VOLEM UA EURÒPA LAÏCA ARRESPECTUOSA DE LAS CREDENÇAS DE CADUN I COMPRÉS DEUS ATÈUS !
Suu camin de la conquista deus nostes drets fondamentaus que's tròba uei aqueth tractat constitucionau qui non poderà portar sonque privacions de libertats e la nosta negacion totau.
Que disem non au tractat pr'amor que disem NON a las borgesias imperialistas de l'Union europèa e aus sons aliats :
Lo non de l'esquèrra francesa, alignat a l'imperialisme e au 'chauvinisme' francés que's restaca majament a la denoncia deu penent liberau, a las questions sociaus de la constitucion europèa en har sancerament abstraccion de la formacion d'ua Euròpa hortalessa armada dinc a l'òs ; ua Euròpa racista e opressora deus pòples shens estat que la constituen.
-los sociò-democratas occitanistas qui vòlen véder dens l'Union europèa sonque la possibilitat d'un contornament de l'Estat francés mentre que lo contiengut de classa d'aquera Union europèa e d'aqueth tractat e'ns tiran tota illusion tà çò qui son deus nostes drets.
Tà l'ensemble d'aqueras rasons :
VOTEM NON LO 29 DE MAI DE 2005