tirat deu site de Ràdio Lengadòc
La Calandreta de PÀmias en perilh
La Calandreta de Pàmias se trapa sens escòla. Aprèp maitunas aventuras que li calguèt mudar d'un local a un autre, la Calandreta deu quitar los locals qu'ocupa dempuèi 1996 per partir dins de bastiments pas encara construsits. Lançan una crida, una crida mai que mai financièra.
Coma arriba plan sovent a las escòlas Calandreta, las collectivitats acceptan de las logar d'un biais pas gaire normal, e se trapan dins de situacions bloquadas: se pòt pas fotre defòra una escòla que viu e que fa viure un barri e una lenga mas se pòt pas acceptar d'aculhir d'enfants dins de condicions aital. Es çò que se passa a l'ora d'ara per la Calandreta de Pàmias.
Lo prefabricat qu'albergava la Calandreta de Pàmias serà destrusit. Mas ont se farà la classa? Las collectivitats localas pòdon pas albergar la Calandreta o li logar un bastiment, de paur d’èsser atacadas un còp mai al Tribunal (explicas çai jos): aprèp mai de doas annadas de recèrca e d’accions divèrsas, de bada, la solucion qu’èra estada trobada èra de s’installar dins los futurs locals d’una autra associacion, "Lauseta". Lo problèma es que la Lauseta arriba pas a lançar la construccion de son "Centre Cultural" : la comuna de Pàmias a cedit un terrenh de 2 000 m2, lo Conselh General promet una ajuda unica de 15 000 èuros e la Federacion Regionala de las Calandretas dona, tre ara, 915 èuros per mes, mas cal manlevar 150 000 èuros per far la construccion : las bancas demandan garantidas (en mai de las ipotècas). La Comuna de Pàmias e lo Conselh General refusan d’èsser las caucions.
Solucions, ne veson pas qu’una : una crida urgenta es lançada cap als particulars per far de dons per trobar un chic de moneda per poder bastir l’escòla nòva e per trobar personas per servir de caucions per far lo manlèu a una banca. Sinon…
Los dons pòdon èsser enviats a Calandreta del País de Pàmias –Camin de Pic- F-09100 PÀMIAS (tel. : (0)5.61.60.58.08 ; e-mail : lauseta.calandreta@mageos.com ). Las personas qu’acceptarián d’èsser de caucions se pòdon metre en relacion amb la Calandreta a la meteissa adreça.
Ara, tornam montar dins l'istòria de la Calandreta de Pàmias:
L’associacion de la Calandreta del País de Pàmias es creada en octobre de 1993 amb la volontat de dubrir una escòla per la dintrada de 1994.
En setembre de 1994, l’escòla dubrís dins una sala del Fogal Intergeneracion de Pàmias, que lo cònsol de Pàmias, lo sénher Soula, met a disposicion de la Calandreta, coma president de l’associacion que s’encarga del Fogal. I a 5 mainatges inscrits. Lo mobiliari e lo material son donats per la Comuna (2 laissas, 2 taulas, 1 tablèu blanc), per de sòcis de l’associacion o crompats (cortinas, matalasses, coissins, cadierons, papièrs, jòcs, pinturas, gredons, etc.). L’associacion emplega una persona en CES (Contracte Emplec Solidaritat, ajudat per l’estat). L’ensenhaira es pagada per la Federacion Regionala de! las Calandretas de Miègjorn-Pirenèus. Pendent l’annada escolara, d’autras inscripcions se fan (12 inscrits, de 4 a 6 ans, en junh de 1995). Una segonda persona es emplegada per l’associacion, en CES.
Es pas mai possible de demorar dins aquesta sala venguda tròp petita. Lo Cònsol, que prepara las eleccions, pòt pas mai ajudar l’associacion, se pòt pas comprometre.
Una escòla privada (catolica) del barri, prepausa d’albergar la Calandreta pendent un an. La Calandreta es doncas dins l’escòla Jeanne d’Arc de Pàmias en setembre de 1995, i ocupant una sala pro bèla, e dispausant tanben d’una sala per la dormida e del pati de l’escòla per las recreacions.
Pendent l’estiu de 1995, de parents se son descoratjats e los efectius passan a 6 mainatges a la dintrada. L’associacion pèrd pas de vam e contunha d’organizar d! e seradas per ganhar la moneda que cal per pagar los emplegats e subretot lo material pedagogic que cal per far foncionar l’escòla.
Mas cal trobar un novèl local, que l’escòla Jeanne d’Arc vòl recuperar la sala prestada. Los contactes preses amb lo cònsol nòu, lo sénher Trigano, son decevents : aqueste pòt ajudar pel biais del Conselh Regional per de material crompat o d’investiments dins un local, mas refusa de balhar un bastiment (n’a pas, costariá tròp car de los metre a las nòrmas o de ne bastir per la Calandreta).
Enfin, en mai de 1996, sèm assabentats de la liberacion d’un prefabricat del Collègi Baile. Nòstra demanda de nos installar dins aqueste bastiment es acceptada pel Conselh d’Administracion del Collègi e pel Conselh General, lo proprietari. Pendent l’estiu, l’associacion fa las òbras necessàrias per l’installacion de l! ’escòla.
12 escolans son a la Calandreta, dins sos locals "nòus", en setembre de 1996 (de 3 a 7 ans, PS a CE1).
Amb aquelas "bonas" condicions los efectius pujan : ~20 escolans en 1997, ~35 escolans en 1999, ~37 escolans en 2001, la Calandreta compta 2 classas e fa trabalhar 6 personas.
Mas, justament, es la creissença que mena las dificultats. En efècte, los locals venon petits e, d’autra part, la Calandreta pòt pretendre a una contractualizacion : aquesta contractualizacion es la reconeissença oficiala de l’existéncia de l’escòla e de la "conformitat" de l’ensenhament amb los programas del Ministèri, l’estat prend en carga la remuneracion dels ensenhaires, la municipalitat es obligada de donar una subvencion de foncionament en proporcion del nombre de mainatges escolarizats. Aquò semblava un progrès dels bèls per l’escòla. La contractualizacion foguèt pas obtenguda abans fin d’agost de 1999, a causa de l’oposicion acarnassida del cap de servici de las escòlas privadas de l’Inspeccion academica d’Arièja (lo sénher Jean-Paul Lafargue), que tanben èra conselhièr municipal de Pàmias. Cerquèt dins totes los tèxtes legislatius tot çò que li podiá servir contra la Calandreta. Obliguèt, en mai, lo Conselh General d’Arièja a far pagar un loguièr a la Calandreta.
Dos meses mai tard aprenèm que lo sénher Lafargue, en son nom pròpri, aviá depausat dos recorses al Tribunal Administratiu de Tolosa :
- un contra lo Conselh General d’Arièja que la lei proïbís a una collectivitat publica de metre un local a disposicion d’una escòla d’estatut privat ;
- un contra lo prefècte d’Arièja per aver fait un contracte ("illegal") amb una escòla qu’aviá pas encara 5 ans d’existéncia al moment de signar la contractualizacion, e en mai per çò que lo contracte prevesiá una retroactivitat per l’annada escolara precedenta (1998-1999).
En mai, coma los salaris son estats versats per l’estat als regents, pendent lo periòde precedent, lo sénher Lafargue demanda que los regents tornen lor salari.
Lo Tribunal Administratiu rendèt son jutjament, donant rason al sénher Lafargue. Se la contractualizacion se tornèt signar pro lèu dins las règlas, l’escòla ocupa encara lo prefabricat que deu èsser lèu destrusit per en causa de l’agrandiment del Collègi Baile. Las collectivitats localas pòdon pas albergar la Calandreta o li logar un bastiment, de paur d’èsser atacadas un còp mai al Tribunal : aprèp mai de doas annadas de recèrca e d’accions divèr sas, de bada, la solucion qu’èra estada trobada èra de s’installar dins los futurs locals d’una autra associacion, "Lauseta". Lo problèma es que la Lauseta arriba pas a lançar la construccion de son "Centre Cultural" : la comuna de Pàmias a cedit un terrenh de 2 000 m2, lo Conselh General promet una ajuda unica de 15 000 èuros e la Federacion Regionala de las Calandreta dona, tre ara, 915 èuros per mes, mas cal manlevar 150 000 èuros per far la construccion : la bancas demandan garantidas (en mai de las ipotècas). La Comuna de Pàmias e lo Conselh General refusan d’èsser las caucions.
Solucions, ne vesèm pas qu’una : una crida urgenta es lançada cap als particulars per far de dons per trobar un chic de moneda per poder bastir l’escòla nòva e per trobar personas per servir de caucions per far lo manlèu a una banca. Sinon…
Los dons pòdon èsser enviats a Calandreta del País de Pàmias –Camin de Pic- F-09100 PÀMIAS (tel. : (0)5.61.60.58.08 ; e-mail : lauseta.calandreta@mageos.com ). Las personas qu’acceptarián d’èsser de caucions se pòdon metre en relacion amb la Calandreta a la meteissa adreça.
