Contribucion Anaram Au Patac
amassada deu 9 de deceme de 2005

Bilanç Carcassona 2005

Prumèr, que tienem a díser lo noste contentèr tà çò qui ei de l’escaduda de la manifestacion nationau deu 22 d’octobre de 2005 a Carcassona.

12 000 personas tà manifestar tà la lenga nosta que hasón la pròva que lo noste pòble que’s pòt, eth tanben, mobilizar.

Mes aquò ne serà pas pro e ne’ns devem pas estancar aquíu.

Qu’èm convençuts-das a Anaram, que si volem sauvar l'occitan e víver la vita vitanta en occitan, que’ns cau mostrar a l'estat francés e aus estats italian e espanhòu que ne’ns deisharam pas mei har. Qu’ei pr’amor de l’union nosta qu’apitaram un rapòrt de hòrças, capable de har plegar las politicas d'aquestes estats.

Qu’ei entà d’aquò que credem que la manif deu 22 ne deu pas estar qu'un començar e que cada annada e’s deu tiéner ua manifestacion nacionau ; tà ahortir la nosta determinacion segur, mes tanben tà botar en comun las hòrças de cadun-a ; e tà Anaram, aquò que passa per ua campanha permanenta comuna hòrta de cap tà la lenga, qui permeterà d’amassar lo-as occitan-as.

Solide, Anaram qu’ei prèst a investí’s en ua camada atau.

Que credem que devem exigir l'oficialitat de l'occitan e que las reivindicacions nostas ne deven pas estar ença d’aquò : l'Istòria que ns’ensenhè que los estats ne'ns balhan pas arren, e qu'ac devem préner !

E mei, que perpausam que sia apitat un lògo tà aquera campanha comuna. Un lògo qui cada movement e associacion, culturau o politic o cada persona individuaument, e poderén gahar e atau, militar locaument tà ua reivindicacion nacionau : Occitan lenga oficiau !

Un utís atau que permeteré ua miélher lisibilitat de las reivindicacions nostas.

Totas las accions que hèn socis tot-as lo-as occitan-as ençà e enlà deus Aups e deus Pirenèus e totas las reivindicacions e sian miadas tanben de cap taus estats espanhòu e italian a maugrat que l'estatut de la lenga nosta ne sia pas lo medish acíu. Ne i ei pas lusent totun e que i demora fragile !

Enfin, que credem qu'ei hòrt temps de pujar la votz ; ne devem pas mei trantalhar tà orbir accions ofensivas : suus panèus de senhalizacion en particular, tà que lo poder, quau que sia, enfin e ns’ecosta.

Aqueras accions que’s poderén coordinar au nivèu de l'Occitània.

En esperar que’ns preneratz en consideracion las perpausicions e que’vs desiram ua continuacion de las bonas. Visca occitània !

Anaram Au Patac
2, còsta de la Hont
64000 PAU
tel/fax : 05.59.98.04.90
info@anaram.org

Barrar