Prèsa de paraula d'AAP tau 1èr de mai de 2005 :

Adishatz a tots e totas,
Que v'arremerciam : monde, delegacions.

En aqueste 1èr de mai, jornada de luta internacionau, Anaram Au Patac, en tant que movement revolucionari de l'esquèrra occitana, que vòu tornar ahortir la soa oposicion a aqueth sistèmi qui mespres tostemps mei los pòbles e las personas. E aquò entà acontentar l'enriquesiment de las classas gavidairas.
Que rejetam aqueth sistèmi ultrà liberau qui plaça los interèsts financèrs au dessús de'us deus pòbles, de las personas o de l'environament.
Lo 29 de mai qu'averam de's prononciar sus la societat qui volem doman.
Nosautes e nosautas d'Anaram Au Patac qu'aperam a votar NANI au tractat constitucionau european, ptr'amor ne harà pas que mantiéner l'estatut cò e lo sordeish guastar mei la situacion actuau.

La 1èra rason qui'ns possa a votar NANI qu'ei l'illisibilitat deu tèxte. Los qui lo redigèn qu'an deliberament volut que arrés n'ac lejosse.

En mei, lo pòble occitan e los autes pòbles minorizats n'an pas arren d'esperar d'aqueste tèxte.
Lo dret a l'autodeterminacion, arreconeishut en 1966 per l'ONU, n'i ei pas briga citat.
Los estats que son confirmits dens la lor integritat, darrèr las termièras, en barrar la pòrta a tot desiri d'emancipacion.
Tà la lenga nosa, que contunharà d'estar mespresada per l'estat francés e per l'union europeana.
Los drets fondamentaus deu pòble occitan que contunharàn d'estar escarnoits e nat recors non serà possible.

Aquera Euròpa que s'a pres lo partit de gravar dens lo marme ua sola vision de l'aviéner : l'ultrà liberalisma... e que barra la pòrta a tota auta alternativa.
Aqueste tèxte estosse adoptat, que subiram donc, entà decenias, l'economùia sociau deu mercat haut competitiva, qui a per objectiu un mercat interior on la concurréncia ei liura e non faussada.

Espiam l'actualitat; que parla d'era quita : 
En Alsacia, salariadas d'ua PME que's veden proposar com reclassament un emplec en Romania pagat 110 euros brut per mes. Lo Medef que se'n pòt arregaudir, lo nivelament per lo baish qu'a ja començat.
Aqueth tèxte que hè sagnar los servicis publics, non fixa pas nada durada legau deu tribalh, ni quitament un atge minimom d'escolaritat obligatòria.
Las prestacions sociaus que poderàn estar asseguradas per enterpresas privadas !
Brèu, aqueth tractat que ns'embarrarà dens lo modèu american o los mei praubes que seràn relegats au rang deus ciutadans de dusau zòna.
Aqueth sistèmi que permet au PDG de Carrefour d'estar licenciat dab ua indemnitat de 39 milions d'euros... çò qui representa mei de 2 500 ans a l'esmic; quan au medish moment los salariats de Carrefour e's veden refusar ua augmentacion salariau de 50 euros brut per mes.

Au nivèu paisan lo tractat constitucionau european que torna préner mot per mot lo tractat de Roma qui data de 1950.
E los redactors deu tèxte ignoran que'n 55 ans la situacion agricòu a evoluada ?
Aquera destruccion de l'emplec agricòu, devath los trucs deu capitalisma, que's traduseish per la mort lenta de regions numerosas e per l'explosion de las vilas.

Au nivèu militari, l'union europeana que torna obrir la correguda l'armament.
Tots los estats membres que s'engatjan a augmentar la lor capacitat militara entà poder interviéner dens país tièrs en cas de crisi o entà servir los interèsts de l'union.
Que hè aleujança a l'OTAN e que'n hè la basa de la soa defensa collectiva.
Que refusam aquera Euròpa qui's balha lo dret d'implantà's militarament on bon la sembla !

Aqueth tractat qu'ei ua longa lista d'atacas en règla contra las libertats e los drets nostes : 
Lo dret au divòrce n'i ei quitament pas inscrivut, lo dret de las hemnas a dispausar librament deu lor còs tanpòc.
ordeish, un article que deisha la pòrta alandaa a as gesticulacions deus anti IVG dab la referéncia au dret a la vita.
Nada referéncia n'ei hèit a la laicitat, ni tanpòc a la separacion de la glèisa e de l'estat.
D'auta part, dens l'annexe A, qu'i ei estipulat que la mort n'ei pas infligida illegaument quan intervien au parat d'ua arrestacion regulara o entà empachar l'evasion d'un detiengut, o.. entà reprimir ua susmauta o ua insureccion !

Las personas qui demandan asili que poderàn estar arcuelhudas hòra termièras de l'union. Aquiu los estats europeans que's destacan deu lor dever de proteccion de cap tà las personas en dangèr dens lo lor país d'arradics.
E l'opinion publica ne's poderà pas mobilizar entà personas de las quaus ignoran dinc a l'existéncia.

Entà AAP, lo noste non qu'ei Occitan, Anticapitalista, Internacionalista, Antifashista e Autogestionari.

Que refusam l'idea d'ua "França ua e indivisibla", centralizatritz, com modèu politic definitiu.
Autant com refusam l'idea que lo capitalisma ei l'unic modèu economic possible entà l'euròa e entà tot lo monde.

Uei lo dia ne demora pas qu'au pòble occitan e aus autes pòbles negats, que lo poder e lo dever de mobilizacion e de confrontacion politica. Entau noste aviéner, que devem establir un rapòrt de hòrça alternatiu e constructiu.

Aquò dit que v'invitam donc a participar activament a aquera campanha de refús deu tractat constitucionau.

Ua auta Euròpa n'ei pas sonque possibla, mes qu'ei tanben necessària.

Entà ua auta euròpa, lo 29 de mai, qu'anaram, e qu'anaratz votar e que voteram NANI au tractat constitucionau european.

E visca l'Euròpa sociau deus pòbles !