Anem ! Per la lenga occitana ! Òc !

Lo comitat d'organizacion de la manifestacion del 22 d'octobre que ven a Carcassona, s'amassèt dissabte passat a Tolosa. Lo comitat, compausat de l'IEO, Calandreta, Felco, Oc-bi, Conselh de la joventut d'òc, MED'òc, prenguèt la decision de lançar una soscripcion per ajudar a la mesa en plaça d'aquela manifestacion. Lo comitat d'organizacion serà compausat unicament d'associacions culturalas mas la manifestacion serà dubèrta tanben a las organizacions politicas o sindicalas o als elegits que voldràn participar. Mas per mai de clartat, e per volontat de dubrir la manifestacion a tota la societat occitana, las decisions pertocant l'organizacion, los tèxtes de crida a manifestar, la comunicacion dirècta serà de la sola responsabilitat del comitat d'organizacion.

Una crida serà lançada dins lo monde occitanista mas tanben dins l'esem del monde que se sentis pertocat per la promocion de la lenga, de la cultura e de l'identitat occitana en general.

Un grop de trabalh es a metre en plaça un site internet que permetrà de trobar las informacions necessàrias. Un autre es encargat de prendre contact amb lo monde musical occitan e lo monde artistic per que participen a la manifestacion.

Un comitat de sosten serà mes en plaça amb de personalitats que representan sectors de la vida occitana fòrça variats. Una coordinadora nacionala, Patricia Rosenthal, es estada causida e tribalharà en relacion amb los responsables de las divèrsas associacions sòcias del comitat d'organizacion.

Tre ara, cal gardar aquela data del 22 d'octobre sus son calendrièr per anar a Carcassona. Lo sentiment general es la necessitat de dire de faiçon clara, en recampar lo mai de monde possible, qu'es urgent de metre l'Estat, las colectivitats localas e regionales cap a una demanda fòrta de reconeissença de la lenga e de la cultura occitanas. "Anem ! Per la lenga occitana ! Òc !" es l'eslogan que serà représ pertot dins la comunicacion per aquela manifestacion.

La Setmana n°500 deu 10/03 au 16/03/2005